Ostentar
Velaquí un dos verbos peor usados da lingua diaria. Moitas veces úsase como sinónimo de gobernar ou desempeñar mais o seu significado é concreto e restrinxido.
En galego podemos usalo con dous significados relacionados: mostrar algo, referido a elementos abstractos, caso das cualidades. “Hugo Mallo ostentaba talento futbolístico des que era cadete”. Ou facer alarde de algo, amosándoo con orgullo e xactancia. “Ostentaba o seu título de ATS coma se fose un gran tesouro”.
Nalgúns casos, ostentar pode referirse a actos de goberno ou administración. “O empresariado vigués ostentou un poder oculto na cidade durante os anos da burbulla inmobiliaria”. Mais o lóxico cando falamos de gobernación é usarmos outros verbos como desempeñar, gobernar, dirixir…
Verbo relacionado con ostentar é detentar, un castelanismo que en galego debemos substituír por deter. Mais que significa este deter noso? Gobernar, desempeñar? Tampouco. Deter significa en galego reter algo sen dereito a facelo. Se nos referimos á política, debemos usalo só en contextos de poder ilexítimo. “En Honduras, dado que houbo un golpe de Estado, calquera presidente futuro deterá o poder sen refrendo democrático”.
Dúbidas do galego 